"Cantarin de Navida"


Bendites sean les payes.
dixoi María a José,
que guarden e nos payares
los pastores de Belén.

Per siempre bendites sean,
dixoi a la mula el güey;
que ya tién el rapacín
cuniquina onde ñacer.
¿Bendites sean les payes
¡de los pastos de Belén!

-Sientu que se mueve`l neñu,
apalpa y verás, José,
piensu que ha venir mundu
antes del amañecer.-

-Que ansi sea, y que non tengas
demasiau que padecer.
Que non te dé sofrimientos
a la gora de ñacer.-

-!Que asina sea¡- dixenon
al par la mula y el güey.

Y'asoma un rayín de sol
e nel cielu de Belén;
y llora mui dolcemente
nel pesebre un nuevu ser.

Ye'l rapacín que ñaceu
de María y de Josè.

A so llau averadinos
faciéndulo calecer
co la callor del so cuerpu,
están la mula y el güey.

Mandai Marìa a boscar
un pañalin a Josè,
que de ñerviosu que tá
non ye quien a dar con él.

¿Será porque non lo atopa
o sera que non lo tién?

Ya cuerre la bona ñueva
los rincones de Belén.

-El neñu que s'asperabas
ya tá aquí; venií a ver.
Ta desnudin y tién fame
mirai que i podeis trayer.-

Y los primeros que lleguen,
corriendu a tou correr,
son los pastores, que tán
casi tan probes como él.

Pero toos trayen algu,
ya sea fariña o miel;
Un poqueñin de mantega
o un trapu en qué lo engolver.

-!Ay qué rapacín tan guapu;
que Dios lo guarde pa bien.-
Van mermurando ún a ún
los pastores de Belén.

Y mientres tanto Marìa
sonriyese con José;
viendu al neñu nel pesebre
ente la mula y el güey.